Որդանման ելունի բորբոքումը բավական լուրջ խնդիր է, որը կարող է խիստ վտանգավոր լինել ու լուրջ հետևանքներ ունենալ, սակայն շատերն անուշադրության են մատնում այն: Ձեր ուշադրությանն ենք ներկայացնում որդանման ելունի բորբոքման մասին վկայող 5 ախտանշան, որոնք ոչ մի դեպքում չի կարելի անտեսել:

·        Ուժգին ցավ

Որդանման ելունի բորբոքման դեպքում առաջացող ցավը գրեթե հնարավոր չէ շփոթել այլ ցավի հետ: Այն ի հայտ է գալիս որովայնի աջ հատվածում, սակայն տհաճ զգացողությունները կարող են տարածվել նաև որովայնի այլ հատվածներում, ինչը պայմանավորված է լինում որովայնային պատի բորբոքումով: Նման դեպքում հարկավոր է անհապաղ դիմել բժշկին, այլապես կարող են լուրջ հետևանքներ առաջանալ:

·        Ախորժակի վատացում ու սրտխառնոց

Որդանման ելունի բորբոքման ախտանշանները մարդիկ հաճախ շփոթում են հասարակ սննդային թունավորման ախտանշանների հետ: Սա շատ վտանգավոր է, քանի որ ժամանակին բժշկին չդիմելը կարող է լուրջ հետևանքներ ունենալ: Բանն այն է, որ այս խնդիրը կարող է ազդել ոչ միայն աղեստամոքսային տրակտի օրգանների, այլև նյարդային համակարգի վրա: Սրանով է պայմանավորված նաև սրտխառնոցի առկայությունը, ինչն էլ շատերին ստիպում է մտածել, որ խնդրի առաջացման պատճառը թունավորումն է:

·        Խնդիրներ՝ կապված միզարտադրության հետ

Որդանման ելունը գտնվում է որովայնի ստորին հատվածում, ուստի հաճախ դրա բորբոքման դեպքում նկատվում է հաճախամիզություն: Բացի այդ, միզապարկը կարող է հպվել բորբոքված հատվածին, ինչի պատճառով ցավը կարող է տարածվել նաև միզապարկի հատվածում:

·        Ցրտի և ջերմության զգացողություն

Օրգանիզմում ընթացող ցանկացած բորբոքային գործընթաց հանգեցնում է մարմնի ջերմաստիճանի բարձրացման, որի հետ մեկտեղ նկատվում է նաև դող ու տենդ: Եթե մարմնի ջերմաստիճանը 39°C-ից բարձր է լինում և ուղեկցվում է որովայնի ցավերով ու տենդով, ապա հարկավոր է անհապաղ դիմել բժշկին: Նման դեպքերում չի կարելի հապաղել, քանի որ որդանման ելունը կարող է պայթել:

·        Գիտակցության խանգարում

Որդանման ելունի բորբոքման դեպքում վարակը շատ արագ ազդում է նաև մարդու նյարդային համակարգի վրա: Նման դեպքերում մարդու մոտ ի հայտ են գալիս բավական «արտասովոր» զգացողություններ: Նա չի կարողանում կենտրորանալ որևէ բանի վրա և անգամ դժվարությամբ է խոսում: Հարկ է հիշել, որ այս դեպքում ոչ թե գլխուղեղն է վնասվում, այլ օրգանիզմը սկսում է ամբողջ էներգիան ու թթվածինը վատնել վարակից ազատվելու համար: Արդյունքում առաջանում է թթվածնաքաղց, ինչն էլ հանգեցնում է նման «տարօրինակ» վիճակի:

Նյութի աղբյուրը՝ med2.ru